لمواليد الستينات والسبعينات وأوائل الثمانينات فقط

[الديحاني]

...
تذكرون
...

البنات لي حطوا دهن أو حنه يلفون شعرهم بكيس جمعيه ولا كيس خبز لبناني ولازم شعار المطاحن يكون فوق .

لما يعض ايدك واحد على بو يسويلك ساعة

التصوير الفوري عند مصور الجمعية، لازم الخلفيه زرقه وتمشط شعرك بالمشط اللي عنده وعقب يقصلك الصورة بالآله اللي عنده ام ذراع والاطراف مشرشره.


حصة الموسيقى كانت لسنه عدله عباره عن تافاتيفـي تاتيتا والصفقه بصبعين بس

ان شفت واحد عنده سيارة مرسيدس تبي تعرف شنو بالصيدليه اللي ورى بالسياره واخر شي يطلع بلاستر وباندج

اول يوم دراسي يسلمونا الكتب كلهم مع بعض من الصغير للكبيرمربوطين بحبل مع 6 كشاكيل


معجون صغير ومعاه عود لونه احمر

لما كانوا الاولاد يلعبون كره بالفريج وواحد من الفريق ناقص لاعب بعد ما يبيله قولجي دفاع هجوم ماشاءالله وطبعا كان اللعب لــــــي اذان المغرب اول ما يقول الله اكبر يعني الصفار.


انتأثر بكعكي في افتح يا سمسم اللي ياكل بسكوت ونشتري بسكوت كاكاو ونقعد ناكل مثله

يوم الجمعةنقعد من الصبح علشان نسمع أغنية في عالم الشعوب قصائص لا تنتهي وعالم حلو بهي يسكن في قلوب في قصص الشعوب.

بالصيف يسبحونا بالطشت والمغرافه الزرقه او الحمره وانتنافض من البرد وننطر متى يكتون علينا ماي

اغنيه ياوردتي يانديه روحي لخلي هديه كانوا اهل الكويت
ميتيــــن ويشوفون ويه البنت اللي كانت ترقص لانها كانت تنزل شعرها على ويهها لي يت صوب الكاميرا

تيلفون بوقرص اللي يخيب ثناك وانت تتصل ومافي ريدايل

لما نرجع من الزواره كنا انتناجر منو اللي ينسدح ورى
بالسياره صوب الجام ويطقها نومه لي البيت لالا ويتحرش بخوانه ينزل ريله عليهم يعني يكون حارهم لوووووول

نربط الشرشف او الفله على رقبتنا يعني سوبرمان
ونصعد فوق الكبت وانط على الدواشق


شريط الشراغي الاحمر اللي اذا اخترب المسدس ما يبيله
حول على كعب الوالده وكمل عليه بالكاشي زالا الوالده مكمله عليك بالكعب


نحط قوطي السانكست بالفريزر عشان يثلج مع العصير
الطوالي بونصين وكل ماتروح تبي تاخذه تلاقي الوالده منزلته تحت وماثلج.

كانوا الاولاد يغسلون الحوش بالويك اند وقمة الوناسه
لما نمسك المساحه واخر شي نطيح له سكيتنج على الكاشي

نستقبل الحجاج عند الحدود من زود الفرحه و لما يجي دور
الصوغه الا هي جم مسواج وقحفيتين والكاميرا الحمره وسياده والبنات قطعه خام مالت هنود وساعه مينتها صغيره.

تذكرون لما كنا نحب عبدالرحمن العقل ونروح مسرحياته السندباد والزرزورر والف باء تاء ولما الحرامي يكون وراه نصرخ
وراك وراك وهو يقول وينه يمين يمين


عزايم قبل الصماط مفروش على كبر الحوش اللي على صورة ميوه (فواكه) وريحته لازم ريحة مطبخ وقاعدين على المده ولما نقوم ريولنا كلها شخوط من المده


هبينا في مجلة المجالس وبصفحة كريمة شاهين اللي
يكتبون فيها انا فتاة ابلغ من العمر 18 سنه واحببت شابا حبا جما ولا استطيع ان افارقه وتقدم لي اكثر من مره ولكن اهلي رفضوا .


هبينا باغنيه سليمان الزيمان وليي في ربوع الشمال غرام حي وزنبقه طاهره والمسجل على قاري بمنتزه
الخيران وحد الصوت العالي وفراره بالمنتزه


لما بلشوا الشباب تدخين كل واحد حاط باكيت بمخباته ولافه بكلينكس عشان ما يبين من الدشداشه الصيفيه ولي شاف
واحد من الربع يدخن يسأله السؤال المعهود (ها فلان تكنها ولا ما تكنها ) ولازم مالبورو احمر شعار الرجوله.


ايام الدراسه قبل نشتري قلم فسفوري اصفر ولا برتقالي عشان نظلل على الشي المهم اخر شي مظللين
كل الكتاب وين الشي المهم



الكشخه قبل كانت عباره عن سيارة هوندا بيضه اكورد
باب واحد ولازق على الرقم من ورى شعار نادي الكويت يعني كووول وولد العاصمه والمشط بالدرج اللي على قبضة يد حق الجاكسون وحاط بالمسجل فرقة الدانه ولا عبدالكريم.

لما تطوروا الشباب بالطلعه عقب سوق الديره والعماره
البيضه قاموا يروحون الصالحيه ويدشون محل محل ويتطمشون حجي هذا بجم وهذا بجم) لين يطردهم راعي المحل لما يعرف ان المخباة مافيها الا 1.500 حق الرده يا بالتاكسي ولا وانيت.


لما يبوق الصبيان سيارة الوالد كانت الريل اليمين على
البانزين والريل اليسار على البريك من الثواره .... ولازم طبعا يمر على الربع بالفريج ايتشيحط عليهم


لما كانت جائزة البيبسي سياره بالمغاطي مالت البطول كنا
الظهر نروح الحوش الوراني ونبطل السحاحير كلها وبعدين نرد نسكرهم اي كلام جود الغازات كلها طايره ومتبخره وصاير ماي مايوه


لما يقول الاستاد ان هذي الصفحات ملغيه تعال شوف التشخط اللي على الصفحه من فوق لي تحت

لما نتهاوش مع ولد الجيران ونقوله وخر عن بيتنا
ويقعد يحوس جبال البيت ويمر يمنا ويقول ماحشتك ماحشتك

كمبوتر صخر 170 عشان لعبة الأميرة أم الخواتم ورامبو
اللي يطير الطياره ولي دش الوالد حطينا شريط بنك المعلومات يعني استفاده لوووول.


لما يروحون الصبيان السوق مع الوالد يشتري لهم خامات حق العيد اخر شي شاري طاقه كامله نفس اللون وتشوف باول يوم العيد من الوالد لي الاخو الصغير نفس الدشاديش

تقول فرقة التلفزيون

حجابات الحريم قبل بوربطه والنظارات هالكبر تقول داشين فلم دايمنشن والحين قاموا يخشون صورهم ولا يشقونهم من الفشله


شامبو درين اللي بغرشه حمره مادري ورديه يعني كان كشخه بس ياويلك يحوش عيونك 3 ايام انت عمي لوووووول.


لا بغوا الشباب يشيلون حديد قبل يعبون قواطي نيدو اسمنت
ويحطون بينهم بايب حديد وهوبا واخر شي منكسر ه ظهورهم

المسجلة السوده مالت استاد الانجليزي لي دش علينا فيها قمة الوناسه اليوم ليسيننج يعني مافي اسئله وروح سكشن فايف ترررررن هاي سوبر فالكون.


السشوار البيج بو جنطه بيضه تقول لاب توب مع الهوز جنه
خرطوم طياره تشغله قبله بيوم عشان يصير حـــار

الكشكول الادعم اللي في صوره بابا جابر الله يرحمه ومن
ورى صوره بعير والمسجد اللي بالضاحيه .


لما نقلد رقص مايكل جاكسون ونسوي حركه الرجعه وحركه الايد اللي على الجام ونغني بيييييييييييلييييييييييه بييييييييييلييييييييه


لي طاح ضرسك قبل تقولك امك مسكه وقطه فوق وقول يارب اخذ ضرس الحمار وعطني ضرس غزال

لما البنات كانو يلبسون ثوب الصلاه عشان يصلون وشباصاتهم
طامره تقول اذون فار



تحياتي
منقول

[ديــمــا]

لووووووووووووووووووووووووووووووووووووووووووووووول

الديحاني والله صج كلامه هههههههههههههههههههههه

هاي فالكون سكشن نبر ون لا ومانفهم منه شي
الاحرف ماتطلع عدل

وتصوير تصور الصوره عالاطراف مشرشره
والاقلام الفسفوريه واذا صفحه ملغيه اوف
نلعب فيها لعب ونشقها لوول

وسالفة النومه ورا بالجامه كنت اسويها
بس محد يناشبني فيها
لوووووووووول بروحي


والله احلا ايام صج رديتنا ورا جم سنه اروع الايام وارع الاشياء
ذكرتنا فيها واخترتها بدقه

يسلمو ديحاني بنتظار موضوع ثاني اروع

[][..صـاحبة السمـو..][]

هههههههههههههههههه ويييي يالديحااني شنو هذا

<<<--- بتصغر روحها يعني مو منهم

لي طاح ضرسك قبل تقولك امك مسكه وقطه فوق وقول يارب اخذ ضرس الحمار وعطني ضرس غزال
لوووووووووووول جم مره كنت بطيح من الدريشه والسبه هالسنون احذفهم من قلب وما شفنا هالغزال لوول

تسلم ايديييينك خيوو
وربي يعطيك العافيه

[الديحاني]

ديما & صاحبة السمو شكراً لكم وشكراً لتواصلكم معي اسعدتوني في ردودكم الرائعه تقبلي احتراماتي اخوكم :: الديحاني

[ديــمــا]

العفو اخوي ماسوينا شي هذا الواجب

لووووووووووووول صاحبة السمو
نطلع بالشمس بالحوش:/ ماتسوى علينا
والغزال ماكو باح ههههههه