قصيدة زجلية جديدة للشاعر //محمد أبو زيد الأسيوطي بعنوان
مفاجأة ؟
والآن
بعد صبر سنين
عجاف
بعد أعوام انكسار وانهيار
اكتشاف
أن لسه فينا صحوة وان فينا بعض نخوة
وفي عنينا ضوء نهار
بعد ليل معتم
وطال
بعد ما بعنا ماضينا بالرخيص
في بصيص
م الآمال
فيه حريص وسطينا لسه
ع البلاد
فيه جمال في الروح ولسه
فيه ضماير صاحية حاسة
أيوة لسه في مجال
للإصلاحات
فيه أمل نحيي اللي مات
والسكات ينطق ويحرق
في الفساد
يعني ما وصلناش نهاية للمطاف
واعتراف
للتاريخ والزمان
اللي جاية سنين آمان كلها بركة وخضار
والعمار فوق الخيال
والنضال أصبح مباح
والسلاح
في أيدينا قال
مش ح أخاف
والآلاف
م المليارات تاني رجعت للغلابة
وبالحلال
والعمل بقي شيء متاح
والوطن عاش في ارتياح
وابتدي عصر انفتاح
واكتساح والكفاح
والنجاح
دايما عظيم
والوطن أصبح كريم
ع الغلابة المحرومين
والنعيم
غطي الكتاف
واللي خان من تاني تاب
قال دا والله فيه حساب
من عذاب
الآخرة خاف
واللي سرقوا من جيوبنا
واللي حرقوا كلهم
رجعوا نضاف
والغني ويا الفقير والصغير
زي الكبير
والأمير وابن الوزير
كل عايش في إتلاف
والمعارضة بقي قوية والحكومة ميه ميه
كل شغال فيه حماسة م المواطن للرئاسة
لاء وأصبح فيه سياسة
للخلاف
ربنا قادر وهادي
للعباد
وانتصرنا ع الأعادي
واللي جاي في أيدين ولادي
والإرادة بقت بلادي
والغني بقي مهرجان
والزراعة والصناعة والتجارة
مالها زي والتقدم والرقي
صوته بان
وامتلكنا في أيدينا قوتنا
لا وبنصدر كمان
يعني من بعد السعادي
مش ح نشحت ع الببان
مش ح نطلب المعونة من سوفيت أو أمريكان
والرغيف
عمال بيكبر كل ماده
والسعادة
في الوجوه
والبشر عماله تشكر في القيادة
والقيادة
حالفة تعدل مهما كان
وأتلغت كلمة وساطة من الديوان
والعبادة
في كل يمه من البلاد
خير بلدنا للولاد
فاض وزاد
والغني
بيدي الفقير من زكاة المال
وشال هم العيال
والمريض في أيديه دواه
في المعاد
كل من رزق الوطن وبيستفاد
والمساجد
أتملت بالمسلمين كله بيصلي
وصايم ع الحرام
والكلام
في الخير تملي
والمسيحي راح يصلي في الكنيسة
في سلام
والمسجد الاقصي رجع للمسلمين
بالتمام والكمال
كله دي طبعا حقيقة
مش خيال
لما يبقي فيه رجال
لما يبقي فيه بشر
لما يبقي فيه أمير للمؤمنين
لما يبقي فيه عمر
بن الخطاب
لما نرجع للصواب
لما نحكم بالكتاب
لما نعرف ربنا ونخاف
عذاب الجحيم
لما نبقي مسلمين
والشعب كله يستقيم
لما يبقي فينا ناس
مخلصين
كلهم حب وحماس
لما يبقي لينا كلمة والعمل يصبح بذمة
لما يبقي لينا همه
لما نبقي ونبقي لمه
نبقي فعلا
خير أمة أخرجت للناس
شكرا لكم وتحياتي اخوكم
الشاعر // محمد أبو زيد الاسيوطي
هذه الرسالة تفيد بأنك غير مشترك في منتديات شبكة عرب شات. لتسجيل الرجاء اضغط هنـا
10-03-2008, 06:31 PM
(( مفاجآة )) للشاعر محمد أبو زيد الاسيوطي
العرض العادي
