نصيحة قبل لا تمارس الرياضة بالصيف
السلام عليكم يالربع والربعات شلونكم شخباركم والله ولهان عليكم وايد كلكم وخاصة الى ببالى
مرة كتبت موضوع من سنة او اكثر يمكن احب ان اتكلم فيه مرة ثانية لكن بطريقة اخرى ومعلومات متنوعة وعرض جديد عاد جزاكم الله خير وسعوا صدوركم على واتمنى تشاركون كلكم شباب وبنات علشان الفايدة تعم للجميع.....
الموضوع عن امور مهمة قبل ممارسة الرياضه وراح اذكر بعض النصايح والى عنده يزيد حياه الله
1- بهالحر لا تحاول تمارس المشى او الجرى(( لانه نوع من تعذيب النفس)) وطبعا دير بالك تلعب كرة قدم بملعب تراب لان الحرارة راح تخليك تطبخ وتشيب وانت صغير...
2- اكثر من السوائل الباردة برودة معتدلة وتجنب المثلجات لانها قاسية على المعدة والمريئ(( حلوة المريئ هذة ))
3-لا تلبس جوارب (( دلاغات)) ضيقة او مصنوعة من النايلون لانها تؤثر على مسالك الدم والعروق(( هالله هالله بجوارب العايلة))
4-اذا كنت من هواة السباحه بالبحر فاحرص تاخذ معاك زوليه تحط اغراضك عليها ومطارة ماى وشمسية وحاول تروح اول النهار او بعد العصر اما روحة الظهر فمعناته الصبغة تروح فيها والارض تلسعك وتكره عمرك لى ركبت السيارة عقب ما تخلص خاصة لى كان معاك واحد متين ومكرش يعفس سيارتك عفاااس وطبعا ما يحتاج نوصى بلبس النظارة الشمسية لزوم الكشخة...
5- اما اذا كنت من عيال الجخ وما تسبح الا بحوض سباحة فدير بالك اول شى على غراضك لما تبدل لان الى خبرك مبققين عينهم عليك زين لما تبدل واول ما تطب بالمسبح سحبو اغراضك وانت ماتدرى ... وطبعا لازم تاخذ دوش دافى مو بارد وشيك الف مرة على لون ماى الحوض قبل لا تطب ونصيحة من اخوكم لحد يفكر يسبح بمجمع احواض السباحه لانه لونه على طول كركمى .... من الغبار طبعا لاتروحون بعيد رجاءا...
6-احسن وقت للعب كرة القدم بالصيف بعد صلاة العشاء ويفضل ان يكون ملعب حشيش حتى الواحد مايرهق نفسه اكثر من اللازم
7- ياجماعة الى فى تنك او ربو او ضيق تنفس يدير باله على روحه بالصيف وخاصة وقت الرطوبة لانه ممكن يصيبه ارهاق ويضر نفسه..
8- من الاخطاء القاتلة لمن يمارس رياضة ان يلقى نفسه تحت التكييف او السنترال بعد اللعب مباشرة وهو معرق _ الله يكرمكم_ والله يا شباب هذة حركة خطرة جدا على الانسان التعرض للهواء البارد بعد الحرارة وانا اعرف واحد من الربع اسمه يوسف الياقوت بيتهم بقرطبه الله يرحمه توفى من 10 سنين والربع كانو يلعبون كرة قدم بالصيف تعب عليهم وطاح طيحة وحدة الله يرحمه لانه بعد اللعب انسدح على طول تحت المكيف...
9- ياجماعة تحملونى بهالكلمة شوى ومن غير زعل ... الى يحب يمارس رياضه المشى لا يأذى بنات خلق الله تراهم اهلك وخواتك وبناتك والواحد يفكر باجر لى اهله راحو الممشى مايرضى احد يتحرش فيهم او لى تزوج ما يرضى على زوجته او بناته .... اقول هالكلمه لان ناس وايد كرهت تروح الممشى بسبب المصبنة والشباب الى مايراعون حقوق الناس والى ان شاء الله انتو مو منهم بالعكس والنعم فى الجميع
10-لى صرت بطل وتحمست تركب جت سكى والى يرحم والديك لا تنس روحك وانت تخمس بالبحر ترى ياما ناس بدوها لعب وصارت مصايب ومثل ما يقول المثل بقيناها طرب صارت نشب وكلكم يتذكر شنو صار بالعدسانى الى كان عضو مجلس الامة لما دعمه واحد من الشباب ببنيدر وهو يسبح الله فكه والى كان راح من جيس اهله
11- اذا كانو ربعك يسوون مثل ربعى ويروحون يتعشون بالليل بعد اللعب فلا تكثر ويكفيك عصير بارد او سلطة فواكه او اذا عزمت شيزبرغر مع كولا صغير (( مثلى طبعا )) وتلقونى بمكدونالد كل خميس موجود بالليل اتعشى معاهم
===============================
سامحونى جنى طولت عليكم بس والله حبيت اسولف شوى معاكم وهذا الموضوع بس جذى اطقطق فيه وامزمز شوى شغل مزاج لا اكثر ولا اقل وياليت تشاركون كلكم معاى ونسمع من نصايحكم القيمة وعلى فكرة موضوعى القديم كان عنوانه كيف يستعد اللاعب الهاوى لممارسة هوايته على مااظن .....
المهم ان شاء الله يعجبكم
هذه الرسالة تفيد بأنك غير مشترك في منتديات شبكة عرب شات. لتسجيل الرجاء اضغط هنـا
07-03-2004, 04:10 AM
العرض العادي
