الجـــــــــــــــزء3
سعود: وانا اكثر!! مانام الليل كله افكر فيج واقول انه يا الوقت ..
الجود: شو يعني ؟ بتهدني؟
سعود: لادفيتج !!شوفي انتي عندج ثانوية عامة ..وانا مابا اعطلج ومن تخلصين مالج عذر ..
الجود: شو تقول؟
سعود: اباج تجابلين دروسج وانا مول ما بلعوزج ولا بتصل ..ومن تخلصين امتحانات ..
الجود: هيه؟
سعود: ابا اشوف حرمتي !!
الجود: نعم؟ نعم؟
سعود: هيه نعم ابا اشوفج !!وقبل ما اكلم اهلي ..انتي موافقة؟.
الجود وهي تصيح: هذا احلى يوم فحياتي..يوم بكون من نصيبك ..
سعود: انا وعدتج !! وانا عند وعدي !! بس بعد في شي!!
الجود: امر تدلل!!
سعود: انا اعرف انه اسمج الجود ماله داعي تجذبين (فهذيجي اللحظة احمر ويهها ..ماعرفت شو تقول وكمل) من اليوم وساير اباج ماتتصلين ابد لين تخلصين اماتحانات ..
الجود: بس انا ما اقدر اعيش من دون ما اسمع صوتك !!ما اقدر!!(وتصيح)
سعود: سمعيني عدل !!لاتصيحين اعنبوه !!الا شهر هب سنة !! وبغيتج تغلقين تيلفونج وان فتحتيه وماخلصتي امتحاناتج ينتهي من بيننا كل شي !!كل شي تسمعيني؟ وبطرش لج مسج وان وصلني التقرير خلاص!! عرفي من نفسج!!
الجود: بس صدق بتوله عليك !! لازم اسمع صوتك !!
سعود: غناتي بتسمعين صوتي وايد عقب الزواج وبتملين بعد!!يالله بترخص عنج ياحلوة ولا تنسين انه من تخلصين امتحانات هو لقانا
الجود: اكيد ..ولاتنسى انه في وحدة اتحبك!!
سعود: وانا بعد !!يالله باي ياغناتي وخلج عند وعدج!!
الجود: تامر الله يحفظك!!
سعود: واغلقيه!!
الجود: ان شاء الله
(وكان الفصل الثاني على اخره ..وشدت حيلها ..وكان تفكيرها كله صوب سعود ..شو يسوي؟ ياكل عدل؟ يرقد عدل؟ اكيد يفكر فيها وسارت عند امها..)
الجود: اميه؟ اميه؟
ندى: ها امايا؟
الجود: بسير عند الدكتور ..
ندى: جيه اميه بلاج؟
الجود: لاااا!! اميه بركب تقويم !!
ندى: واااابووويييييه!! جيه بلاهن ضروسج؟
الجود:هههههههه مابلاهن شي !! بس جيه!! كل البنات يلبسونهن ويطلعن غاويات!!
ندى: أهـــــأ !! ماجد سمعنا عن هالمنكر بعد!!يعني ضروسج مافيهن شي ويركبون لج حدايد.؟ ياهو منكر !!
الجود: اميه عاد يالله!!
ندى: سيري حد مانعنج؟ هاكوه الباب مشرع!!
الجود: لا اميه!! (وتضحك ضحكة مكر) قصدي هاتي بطاقتج ..
ندى: ماشاء الله مافي شي ببلاش؟ كم بتسحبين؟
الجود: اظني اول شي الفين وبعدين على دفعات !!
ندى: ويديه غربل الله منكرج !!هذي لعبة مقصة!!! الا نهــــــــيبة!!!(وتحبها على راسها)
الجود: يالله ماماتي عشان خاطري!!
ندى: سيري فجي الشنطة وفي البوك البطاقة والرقم السري ولاتتحيرين !!
الجود: ان شاء الله تراني باخذ ويايه سامة ودامة!!
ندى: انزين قولي حق جعفروه مايسرع!!
الجود: ان شاء الله (وروحت ويا ربيعاتها عند الدكتور ..وفي البيت وصل ابوها)
سالم: السلام عليكم !!(وعج عقاله وسفرته ويلس حذال حرمته) ها نداية؟ وينها بنتج؟
ندى: سارت الدختر!!
سالم: جيه بلاها؟
ندى: فديتها شافت البنيات يحطن توقيم اووووه!!تقويم وسارت بتركبهن!!
سالم: انف!! حديد فضروسها؟ والله هالبنية دلوعة!!
ندى: راس مالنا هالبنية ..لازم ندلعها وراشد فديته فأمريكا !!منو بيدلعها غيرنا !!
سالم: انا ماعلية من كلامج !!بدلعج هذا بتدمرينها !!
ندى تنفض كندورتها: بسم الله عليها من التدمير !!لاتيلس تقول عن بنتي جذيه!!
سالم: ماعلينا !!رمستيها عن السفر؟
ندى: رمستها وقالت هالسنة ماتبا تسافر !!
سالم ابتسم ابتسامة مكر: دامنها ما تبا تسافر بنخليها عند اخويه علي ..
ندى: الا امايا!!
سالم:شوفي عاد بنتج مدلعة بسبتج وبتدمرينها وان ما سمعتي كلامي ماتلومين الا نفسج!!
ندى: شو تبا تسويبها؟
سالم: بسوي شي يخلي بنتج تعرف جيمة الصرف اللي تصرفه بالهبل!! وتثمن الاشياء وتحمد ربها على هالنعمة!!
ندى: بس يا سالم!!
سالم: لابس ولا شياته !!بتتعلم المذهب العدل عند اخويه وحرمته واميه !!من غير الحشمة سمعتي؟ الحشمة!! بتنجبر تلبس عباة وشيلة من نفسها بدال المرصص والقصير!!
ندى: انا ماروم اهدها روحها !!
سالم: سمعيني عدل وخلي كلامي حلقة فأذنيج تبين بنتنا اتم على جبدنا طول العمر؟ الله عاطنها جمال ومال وحلاة ووحدة شايفة عمرها على الناس وكي شي متوفر فايدها ..من غير هي جد مرة زارت عمها ولا شافت عيالهم ..اقولج عايشة عيشة شيوخ!!!
ندى: لازم تعيش هالعيشة ..لانها بنتنا ونحبها!!
سالم: نحبها ونموت فيها بعد!!لكن لكل شي حدود !!يوم قلنا لها انه ولد عمها عواد خاطبنها ..شو قالت؟
ندى اتلعثمت: إإإإإإإإإه !!قالت ..قالت اسمه هب حلو!!
سالم منفعل: جان سمعتي بنية تقول هالكلام؟ من متى تحكم عالريال من اسمه؟
ندى: اكيد ماعيبها!!
سالم عصب ازيد: وتعاشيني بعد؟ وابويه عليج !!لاشافوا بعض ولا شياته !! بس لسانها طويل ويباله قص!!
ندى تترجاه: دخيل الله سالم!! لاتفتح هالموضوع وياها هالفترة!!
سالم: ادر عليها امتحانات !!بس من تخلص امتحانات بتشل شلايلها وبتروح بوظبي!!
ندى: طب السالفة الحين!! ماتشوفهال ياية!!
الجود: hi !! hello mom dad..
سالم: شدي ..يالله ترطن بالانجليزي بعد!!(وتبوسه على راسه)
الجود: فديت هالثلعة!!(قصدها الصلعة) هههههههه
سالم: حشمي يابنية!! اشوف فجي حلجج
ندى: راويني غناتي!!
الجود: آآآآآآآآآآآآآآآآآآآآآآآآه!!
سالم يضحك: اندوج!! وفيهن ليتات بعد!!
ندى: شو ها الوان؟
الجود: شو ليتات؟ لاثتيك !!فديتني طالعة غاوية ..لكن في شي!!
ندى: شو بعد؟
سالم: انا اعرف من لبست هالخطام ثقل لسانها ..
الجود بحسرة: هي والله !!رمثتي بتثقل !!واكلي بيقل!! ولثاني بيقثر!!
سالم: ياحية يوم بيقصر!! سوا خير الدكتور !!يزاه الله الف خير وجعله هذا الشغل من ميزان حسناته..
الجود: ابويه !!لاتقول جذيه عن بنتك!! راث مالك هالبنية!!(وتأشر على عمرها)
ندى: وابويه!! شو اث ؟. بلاج انطقي عدل!!
الجود: واعلية عليج يالجامة ..ماروم يانداية شي ثار واثتوا !!
سالم: اندوك انته غدت شرا اليهال !!
(ويضحك وروحت حجرتها تذاكر وكانت تحس باوجاع التقويم فضروسها يعورنها واكلها قل لدرجة تاكل شي لين ..وتحس عمرها بتموت لانها تفكر في سعود وفي امتحاناتها وشدت حيلها قطعت الكتب تقطيع ..كانت حاطة في بالها تيب نسبة عسب تدخل جامعة الامارات وتدخل التخصص اللي تحلم به وهو الكب العام..صابها الارق ماتعرف ترقد ..وركزت تفكيرها بدراستها ..وبدت الاماتحانات وكانت تضغط على عمرها عالاخر وانقطعت عن العالم ..يالسة فحجرتها ماترضى تطلع من الحجرة الا على المدرسة ..تمتحن وترد لكن ترد تصيح ..تخاف كاتبة في الامتحان شي غلط..كانت كل ماتخلص ورقة الامتحان تحسب درجات الاسئلة اللي واثقة انها صح وتوصل لين الحمسين درجة وتوقف تعرفون ليش؟ بس تضمن نجاحها ..وعلى اخر الامتحانات كان صعب..ردت البيت وهي خايفة وتنتفض ماكانت تخاف من ردة فعل اهلها بس كانت تبا ترفع راسهم ..ومن ردت على طول فجت تيلفونها على امل انها تحصل مسج من الحب ..لاحصلت مسج ولا شياته مثل ماوعدها ..بس مسجات عتاب وحب من ربيعاتها ..وسوت له بلهفة ورد عليها ..)
الجود: الو؟ مرحبا شحالك؟
سعود: الجود؟ يامرحبا مليون ..شحالج فديت قلبج؟
الجود: بخير الحمدلله ...ياويلي ..ياويلي ياويلي ياحبيبي..
سعود: شو سويتي في الامتحانات ؟
الجود: الحمدلله زينة !! (وعلى طول دخل في الموضوع)
سعود: يعني شوفتنا لبعض باجر؟
الجود وهي زايغة: باجر؟ اعنبوا حار بحار؟
سعود: مالج عذر !!احبج يال...(نسى اسمها فجأة واتذكره) الجود!!
الجود: اخاف بث عشان خاطرك بغامر مغامرة عمري !!زين؟ وين بنتلاقى؟
سعود: امممممممم ..الصراحة؟ انا ماروم اييج دبي !!(كأنه فجر قنبلة ذرية)
الجود مفولة: نعم؟ نعم؟ اذا انته ماييتني دبي عيل انا بييك بوظبي؟
سعود متردد: هيه..
الجود: آثفة ما اقدر ...
سعود: شو؟ شو ماتقدرين؟سمعيني عدل وخلي كلامي يغدي حلقة فأذنيج !!اذا باجر ماييتيني بوظبي.. بقطعها بطاقتي ولا بتعرفين عقب تحصليني ..فهمتي؟
الجود : لا!!لا!! بث والله اخاف ..اعنبوا اييك بتكثي لين بوظبي؟اخاف يثوي فية شي راع التكثي!!
سعود يتمتم بصوت ماينسمع: وانتي من زينج عسب يطالعج او يسوي شي؟ الا خالة شقرا!!
سعود بصوت ينسمع: اقول!! انتي من تركبين التكسي برمس وياج لين توصلين بوظبي ..الصراحة في دبي عندكم التحريات ..ماشي كاني ماني يزخون البنية والريال !! احيد ربيعي طالع وياربيعته ويتمشون بالموتر(قصده انه يتكلم عن نفسه ويوم يزخونه) والله انه زخوهم وانفضحت البنية وانفضح الريال!! وانا اخاف على سمعتج يا حبيبتي!!
الجود: خلاث اوكيه..
سعود:رتبي الامور ويا اهلج بعد!!كم بتمين عندي؟
الجود: والله ماعرف بث مابتأخر بسلم عليك وبروح ..انا فحياتي مازرت بوظبي ..لكن عشانك ؟اثوي المثتحيل !!
سعود: فديتج انا !! هذي هيه حرمتي جيه اباها اتطيع ريلها !!
(اوهمها بكلام ريلج وحرمتي واهلي يبون يخطبونج لي وسوالف الشباب البطالية لين صدقته ..وماعلمت سلامة وفاطمة ..نزلت يلست ويا اهلها)
الجود:ماماه؟
ندى: ها اميه؟
الجود: ابا بيزات باجر بثير الثيتي ..بهوم لين اشبع !!
ندى: كله هاتي !!هاتي!! ولامرة قلتي خذي!!!
الجود وتبوسها: خذي!! شو اثوي انزين؟ انا ما اشتغل وارباب مالي مايطيع يعطيني !!فديتج انا!!
ندى: والله ماتهونين علية !!سيري سيري الغرفة وخذي !!
الجود: تراني باجر يمكن اتاخر ..بتغدى عند ربيعتي كلثم مثوية عزيمة وبطلع من عندها العثر وبتعشى في الثنتر !!
ندى: زين خلي جعفروه ينزلج السنتر وايييني..
الجود: لا اميه مايحتاي !!كلثم بتثير ويايه هي بتوديني !!بث اباه يوثلني بيتهم ..
ندى: زين يا امايا ..اووووه عن انسى ..ترا ورا باجر بتسيرين تسكنين فبوظبي ..
الجود منصدمة: شو؟ شو؟
ندى مكتئبة: حكم القوي على الضعيف ..انا مارمت اخبرج لين تخلصين امتحانات ..مع انه ابوج كم من مرة يلمح لج وانتي ولا حاسة ..ترا ابوج خسر بيزاته كله في البورصة ..
الجود تشهق: الله!! وابوووييييه !!!ليش؟ وكيف؟
ندى: اسمعيني عدل ..ابوج يبا يروح امريكا عند اخود رشود..
الجود: امريكا؟ انتي اول شي خبريني كيف؟ يعني نحن فقراء؟(وقبضتها الغصة)
ندى: لافقراء ولا اغنياء !!على قد حالنا !!ابوج هالمرة راهن ببيزاتنا كلهن !!وبنسير انا وهو امريكا
الجود منصدمة: انتي؟ اميه دخيلج !!(وتصيح)ابا اثير وياكم لاتخلوني روحي !!
ندى: امايا؟ غناتي؟ انا بسير ويا ابوج اول شي لانه ماياكل الا من ايدي ..ومن غير عنده صفقة وياريال واذا اتفقوا ..هامعناته انه الله بيرزقنا مرة ثانية ..وانتي مابتسكنين عند حد غرب !!عند عمج وحرمته وعياله ويدتج !!
الجود: ومرته الكويتية؟ اخافها ماترضى !!
ندى: عيب يا امايا!!هذي تنحط على الجرح يطيب ..انتي ماتعرفينها ..لكن يوم بتشوفينها بتدخل خاطرج ..وعن تنسيني !!بيي ولد عمج حمدان وحرمته بياخذونج وعاد غناتي حشمي !!وغدي حرمة ..اي شي يقولونه قولي ان شاء الله...
الجود تقاطعها: الا امايا!!مالي خث هب ثايرة انا مينونة ؟ لا!! يعني لا!! بثير وياكم !!
ندى منفعلة: ودراستج ؟ها؟ منو بييلس يعابل فأوراقج؟
الجود: تلتعن !!جهنم!! مابا ادرث!!
ندى: بتدرسين غصب عنج !!وعن شياطينج التسع!!
الجود: مابا يعني مابا!!
ندى: صدق انج نحيسة !!لكن انا راسي ايبس عن راسج يالهرمة!!
الجود: وليش يعني مثتعيلين؟.حتى النتايج ماظهرن!!
ندى: يالجامة!! اقولج صفقة عمل !!وابوج مثتعيل على قولتج !!ونحنا بنتم بس في الصيف ..وبيلس اطبخ وانظف واطمن على اخوج وبنشوف شو دراسته بعد.. ومن يومين ابوج باع الارض اللي في جميرا حق المشروع اليديد ..
الجود معصبة: ردت وقالت طبيخ!! شو طبيخ ياامايا!!همها على بطونهم !!بث بعدني مابثير!!
ندى معصبة: انا وراج والزمن طويل!!
الجود: وانا وراج والزمن قثير!!
وروحت غرفتها وهي تحاتي كيف بتسكن فمكان غير بيتها ..ومن غير اهلها بعيد عنها الا تقنع امها انها تسافر وياهم ولازم بعد!! والمشكلة الاكبر انه باجر بتروح بوظبي روحها لاحسيب ولا رقيب وضرب خط من دبي لبوظبي ..اعنبوا مايقدر يتنزل ايي على الاقل ياخذها؟ هو بايعنها بايعنها !!طول الليل ما رقدت وهي تتجلب...كل ماتفكر انها بتشوفه تنتفض من غير ايدها تبرد بسرعة ..وعلى الصبح الساعة 10 ..نشت مستانسة ..اتسبحت وبدلت ..لبست برمودا جينز اسود لتحت ركبتها وقميص كويتي وسيع شرا الفراشة ولونه مزيج من الاحمر الفاقع والنيلي الفاقع ويد قصيرة لين كوعها ..لفت شعرها على فوق وثبتته بالكليبس وعسب تبين طفولية حطت كليب الفراشة حمراء على ينب ونزلت قصتها ..اتجحلت من داخل وحطت جلوس شفاف ..وتبوس المنظرة)
الجود: فديتج يالجامة مغواتج !!بتعجين ثعود !!اثميه بيتخبل عليج!!
(نزلت وسارت تحت ماحصلت حد ..خذت الدريول ونزلها عند المحطة وركبت التكسي وسوالها سعود)
سعود: هاغناتي وينج؟
الجود تنتفض: تونا طالعين من المحطة ..(وبعد فترة وصلوا طريق الرفاعة ..بعدين السمحة .. ووصلوا بوظبي..) بابا؟ هذا شو اثم الثنتر. ؟ وايد كبير وحلو!!
راع التكسي: ماما هذا بيلدينج مال اتسالات !!
الجود فخاطرها: الله يثامحج يا امايا والله يثامحك يابويه !!بوظبي فعمري ماشفتها حتى مبنى الاتثالات اتحراه ثنتر!!
(ويتصل سعود)
الجود: هافديتك؟ نحنا عند مبنى الاتثالات !!نوقف هناك؟ زين ثعود؟ كلهم يطالعوني ..انا ميتة من الزياغ ..زين !!زين اترياك (وردت لها النفضة وبعد 10 دقايق وقف موتر ورا التكسي على طول جسم جامة انجلب للاحمر ويوم ينجلب للاحمر هامعناته انه خطر ياينها وهي ماتدري شو السالفة ..) زين !!زين بنزل!!
(حاسبت التكسي ونزلت ورد لها الخوف ..كان الموتر اللي ورا مخفي شامل كامري لا انفينيتي ولا شياته ..ورقم منقع ..بطلت الباب يلست منزلة راسها وعيونها عالارض على طول)